家陣政府努力救樓市，果然吸引到不少買家，加上年尾特別多人拉埋天窗，而且又臨近聖誕節，所以售賣家居電器就出現小陽春情況；不過香港的經濟始終陷於谷底，無論甚麼消費都精打細算。今個星期，於九龍灣德福廣場某電器連鎖店玩大特賣，而且許多行貨都有得減，確係唔常見，而今次嘅貨品有洗衣機、暖爐及微波爐等，其中小記都想買的抽濕機更平至55折，十分筍價。但由於數量不多，想添置心水新家電，更要快啲去搶喇！
記者：梁煒健 攝影：周旭文
ImageGirl：Marcella
買洗衣機必定要慳位，而論最襟用必然係歐洲製造嘅滾桶式洗衣機，可惜唔係好多款有得平。由意大利製造的珍寶Gala系列中，今次大特價就有款GLT-7頂置式洗衣機，比街價平足$800；此機可以洗5公斤衣物，乾衣速度為600轉，廠方更提供免費送貨及安裝服務，兼幫你搬走埋部舊機㖭！有得平兼包送貨，自然成為全場必掃貨色。
原價：$3,190
街價：$2,980
超筍價： $2,180（限售50部）
型號：珍寶GalaGLT-7
體積：33.5吋高×16吋闊×24吋深
由於是中原電器的獨家貨，所以這部美的EG7017P微波爐坊間冇地方有得賣，有得賣亦要以原價發售。除了作一般「叮」餸、解凍及翻熱外，此部微波爐更有燒烤功能，微波700W燒烤1000W，火力夠猛，聖誕節用嚟作烤雞就最一流。今次減價期內，除了平咗$200，更加送同廠出品嘅迷你電飯煲乙個，相當適合現時2至4人嘅小家庭㗎！
型號：美的EG7017P
原價：$799
超筍價：$599（限售30個）（另送三人公主電飯煲乙個）
冷鋒到，又係暖爐、暖風機出動的日子。市場上的暖風機以國產居多，未必款款合乎安全標準，而充油式電暖爐雖然要頗長時間Warmup，但就較為穩陣安全。呢部飛利浦HD-3411充油式電暖爐，熱力可達2,000W，夠暖！由於設有自動衡溫系統，夠熱就會自動停止發熱，耗電量唔多。雖然舊款型號，9頁風琴式嘅散熱片較阻碇，但因較安全兼有特價，擺喺大廳就最啱。
原價：$1,098
街價：$1,030
超筍價：$788（限售30部）
型號：飛利浦HD-3411
體積：25.5吋高×6.5吋闊×21吋深
家陣時凍時熱，搞到天氣非常潮濕，啲衫總係晾極都唔乾，住喺山頂或海邊的朋友就最感受得到。這部「日立牌」RD-1838CH茶几型抽濕機，雖然舊款又阻碇，但其每日勁「抽」16.2公升水就確厲害。最吸引地方此機仍然是日本製造，有特強、抽濕兼暖風三種選擇風速，平到55折二千幾蚊都好難搵到；家陣只得20部咋（對不起！記者都買了一部，只淨19部至真！）。
原價：$4,690
街價：$3,980
超筍價：$2,599（限售20部）
型號：日立RD-1838CH
體積：27吋高×12.5吋闊×14.5吋深
香港人最喜歡食火鍋，就算天時暑熱照樣食，何況家陣轉涼更合時宜，所以每個家庭必有一個電磁爐看門口。新出品的德國寶電磁爐，1,600W煮乜火鍋料話咁快就熟，其勝人之處就係附有時間功能，較啱時間就會自動熄火，最長有99分鐘，煲湯十分方便。此爐一出就玩半價，更送埋一個厚底不銹鋼鴛鴦煲，外面賣成$150一個㗎！
型號：德國寶GIC-F16D
原價：$796
街價：$796
超筍價：$398（另送不銹鋼鴛鴦煲）（限售50個）
小記來到該店舖，發覺場內其實重有唔少其他牌子正貨大減價，如洗衣乾衣機四千多元就搞掂；除飛利浦外，其他牌子的充油暖爐更可平到$600一個；三千多元一部的日本製分體式冷氣機；只賣$799的飛歌牌超薄抽油煙機；又有大量男士專用電鬚刨，$360就有交易，比市面平足一嚿水；真係要攞定Visa嚟掃貨。
中原電器行
電話：27572088
地址：九龍灣德福廣場Ｉ期G23-24號舖
減價日期：今日至12月14日，貨品售完即止。
營業時間：早上11:00至晚上9:30
備註：所有貨品均屬行貨，附有一年保養。使用現金或Visa均可，簽卡毋須另付手續費。每件大型貨品均免費送貨，冇電梯則另計。