名媛同老公嘅婚姻已經名存實亡，各有各去玩，本來都相安無事，但係佢兩個都玩得好張揚，咁就容易出事。早排名媛同個鬼仔去咗楊其龍喺中環嗰間dragon-i酒吧，咁啱撞到佢老公喺度蒲，咁當然好尷尬啦，兩公婆惟有互相當對方透明，之後兩個都拿拿聲走人，去過第二間玩。
但係呢個世界有啲嘢就好鬼蹺，名媛轉咗竇去另一間酒吧，點知佢老公同佢心有靈犀，又去咗嗰度。當時佢老公見到名媛同個鬼仔咁親熱，可能飲大咗，就一時火遮眼，走上去兜巴星咗個鬼仔一嘢。個鬼仔都唔弱，即時攞起枱面個啤酒樽想扑名媛老公個頭，好彩身邊嘅朋友即時㩒住佢，跟住酒吧啲保安又出嚟調停，否則流血事件就好難避免。為咗爭風呷醋而大打出手，呢啲嘢本來好平常，不過名媛同佢老公都有頭有面，如果搞到要報警，到時就真係唔知點收科！
胡杏兒噚日去紅磡都會商場，幫景福珠寶新系列嘅首飾「HowCollection」擔任模特兒，佢着咗一條黑色連身裙行catwalk，杏兒重話今次有五位數字嘅酬勞。呢排胡杏兒同麥浚龍（Juno）拍緊《律政新人王》，佢話覺得Juno係一個細路仔，不過對方做嘢都好認真。
舒淇同張震前日去咗新西蘭嘅奧克蘭，出席由LouisVuitton舉辦、美洲盃帆船賽嘅祝捷派對。喺當晚張震亦有份出席，而舒淇重帶咗個不知名嘅男性朋友赴會。當晚有八百個名人出席宴會，認真星光熠熠。
鄭希怡（Yumiko）噚日喺銅鑼灣幫日本潮流用品店JCLadies做剪綵嘉賓。Yumiko曾經同成龍傳緋聞，問YumikoJC係成龍英文名（JackieChan）嘅縮寫，咁JCLadies同成龍有冇關係？Yumiko好尷尬咁話：「梗係冇啦，你哋唔好咁敏感。」
Yumiko噚日亦有去荃灣出席活動，着露腰裝嘅Yumiko同歌迷喺台上玩呼拉圈。
葉蒨文喺前日同老公林子祥（阿Lam）去廣州登台搵銀，點知落大雨，不過佢哋兩公婆都一於好少理，繼續深情對唱。
而沙麗首《傷逝》同盧巧音首《好心分手》爭攞金曲獎爭到頭崩額裂，沙麗今晚會幫新城演出音樂會，請埋李克勤做嘉賓，唔知佢怕唔怕俾人話做嘢換獎呢？
三人男子組合E-Kids噚日喺尖沙嘴舉行歌迷會成立日，佢哋個會叫E-KidsFamily，譚詠麟帶埋乳豬去撐場。阿倫話雖然E-kids以前喺StarEast餐廳度做，但英雄莫問出處喎！新城電台又頒咗個電話投票中最多人支持嘅組合獎畀E-kids。E-Kids忍唔住攬住阿倫喊，阿倫亦有眼濕濕。