賓架黎退休後半年，靜極思動，與歐洲食品入口商拍檔，預備在史丹頓街開設店舖，專門售賣直接自歐洲入口嘅飲料、食物，保證靚嘢兼價錢相宜，等賓架黎間大寶號正式開張後，我哋又多一個「入貨」地方。
呢日經紀V去參觀賓架黎新舖，行前在上海總會請食飯，叫埋左丁山去。席間，公子L講起陸羽槍殺事件，有一件事要澄清。公子L話：「我去陸羽飲茶，問過啲夥計，得到嘅印象報紙寫錯咗，就係槍手冇先箍頸，後開槍，而係一行埋去就開槍。根本受害人坐陸羽地下十八號枱，背住屏風坐，面對茶室入口，佢可以望到地下座位所有人，邊個出入，一眼見晒。但槍手喺廁所行出嚟，動作好快，剎那間已經完事。」
背屏風而坐，兼且張枱有其他人，槍手好難埋到受害人身體箍頸啫，但點解報紙又會咁樣講嘅？邊個係消息來源呀？真惡搞，報紙報道好難信十足，不過唔知要打幾多折？
公子L嘅尊翁，幾乎日日喺陸羽，公子L隨時相陪，問佢驚唔驚，佢話邊度驚得咁多，總之做人行得正企得正，生死有命，唔會因槍擊事件而影響食慾。公子L態度正確，凡事睇得開，所以佢哋隻馬跑咁耐未有表現，都未怨這怨那，亦唔拉馬轉倉，唔似我哋咁急功近利也。