聽日係國際人權日，好多民間團體趁噚日星期日，喺旺角西洋菜街行人專用區先搞活動慶祝，《基本法》二十三條立法當然係今年討論嘅重點。
其中一個環節──名人學生辯論賽，辯題係「現在就《基本法》第二十三條立法對香港利多於弊」，劉慧卿、何秀蘭、毛孟靜等人一直反對呢條「惡法」，今次卻被迫做正方支持立法，對佢哋嚟講，難度咪話唔高。
結果成個下午，卿姐一方不停講反話，有時直情語無倫次，一時話趁立法會有橡皮圖章就快啲立法，一時又話立法創造就業，甚至引用民建聯近排嘅標語話：「沒有國，哪有家？」
反方基督教聖約教會堅樂中學同學則表現出色，一句「沒有人民，哪有國家？」即刻贏盡全場掌聲，最後重贏埋場比賽。呢句反駁，好多民主派都話冇同學仔諗得咁快。
（圖）劉慧卿、何秀蘭等反二十三條骨幹，要佢哋支持立法，梗係拗極都冇乜說服力。
傳真︰2623-9278
電郵︰