靠玩百變形象出位嘅女藝人，唔理佢哋係因為技窮定係玩到fans都冇新鮮感，好多時幾年之後都會反璞歸真。
日本天后濱崎步亦唔例外，扮完半裸黑妹、豹妹同女泰山之後，呢排都係玩番啲簡單高貴look，而佢喺即將推出嘅第五張全新大碟《RAINBOW》入面嘅造型，連我羅拉都覺得有啲驚喜，當中步姐啲半裸玩水look，一定令fans產生遐想。
由於步姐嘅新碟以彩虹做主題，所以佢喺封面以至內頁嘅相都七彩到暈，連佢喺水中央所影嘅照片，都用電腦特技整到有陽光折射出彩虹嘅效果。不過話說回頭，由於係電腦相，所以步姐個身同樣都用電腦執過，鍾意睇「真嘢」嘅fans睇怕會冇乜癮！
除咗封面之外，步姐隻碟重有乜花臣呢？話說佢隻碟寫明第「零零」cut嘅歌叫《rainbow》，不過你買隻碟返屋企就咁播係冇得聽㗎！歌迷一定要攞密碼上步姐嘅網頁聽咗個melody，然後喺網上留言，提供啲靈感畀步姐填詞，再出細碟先有得聽，唔知將來收版權費時有冇份呢？