中信泰富（267）因國內基建投資保證回報問題，股價呢排好弱，跑輸大市好多。不利因素乜都反映晒，料會因超賣而反彈。上周五最低15.10元，平收15.25元，已成功考驗15元嘅大關口。
中信Call輪9298，近期跟住正股晒散，現價5.9仙，可以投機炒吓，博正股反彈。隻輪明年6月至夠鐘，唔怕溢價縮得好快。由於槓桿率有成25.8倍，而本身又係仙輪，要有心理準備升跌會好快，所以注碼要小心控制。每1個價位變化，已相等於輪價1.7%，能夠成功排隊買貨同成功排隊出貨，已經可以咬住1.2%利潤。
上周五個市最差之時，啲地產股都幾肉酸吓，最後恒指雖然仍然唔見36點，4隻最大地產股，有兩隻升，1隻企定，1隻只跌1格。升得最多啲係恒地（012），收26.35元，進帳45仙。
恒地26元左右係支持位，守得吓，Call輪9473可以用嚟玩上落遊戲，當正股跌幾毫之時買輪，正股彈升幾毫之時套利離場。9473明年3月夠鐘，溢價7.2%，槓桿率19.1倍。新地（016）有隻Call輪9525，數據冇9473咁靚。假設恒地同新地大家升幅一樣，9473會跑贏9525好多。
章盛