聖誕節將至，蘋果基金「童夢成真聖誕老人送禮」行動，日前率先送贈一對簇新運動鞋給十二歲貧家學童忠仔，實現他「有波鞋着」的聖誕願望。生活在赤貧線下的綜援或低收入家庭兒童，可於本月十五日前填妥許願表格（詳情見右表），基金將盡力助孩子償願。
「忠仔就讀間學校遲啲有旅行活動，我原本打算唔畀佢參加，因為一來要交三十蚊費用，二來忠仔着開對波鞋已經又舊又唔着得，費事佢又為咗冇波鞋着頭痛。後尾我知道如果忠仔唔去旅行，會俾學校當曠課一天，我至惟有改變主意。」忠母陳太向記者坦言。
四十歲的陳太，原任職餐廳時薪侍應，奈何去年遭僱主遣散後她再難覓得工作；一向從事街市雜工的丈夫陳先生，受市道欠佳影響，早前亦加入失業大軍，以致家庭經濟陷困，靠領綜援維持生計。
陳太表示，也許因生活壓力迫人，近月她常感心跳快速及失眠，求醫後證實患上精神抑鬱症，目前靠服藥控制病情。
陳太續稱，為了節省開支，她與兒子忠仔身穿的衣物，都是親友贈予的舊東西，「就連拖鞋同其他冬天衫褲，都係親戚畀嘅。可惜偏偏就冇對舊波鞋畀忠仔！」
忠仔一對伴隨他走過多個寒暑的運動鞋，現在已經殘破，且再也容不下他一雙日漸長大的大腳板，令他為此愁眉不展。
在社工轉介下，忠仔近日向蘋果基金「童夢成真」行動許下心願，希望擁有一對運動鞋。
本報了解忠仔的情況後，日前從「童夢成真」專戶撥款，資助忠仔購買了一對簇新運動鞋，好使他如願以償。「對波鞋好軟，着落好舒服。過幾日我可以着呢對波鞋去旅行，以後就着去參加課外活動。多謝！」忠仔日前選購運動鞋時顯得比較害羞及沉默寡言，當穿上喜愛的運動鞋後不禁喜上眉梢，由衷地表示謝意。
按照現行社會福利署綜援的條例，凡領取綜援的幼稚園至高中學生，每年均獲發放一次就學開支津貼，用以補貼學費、全日制學生膳食費用，以及用以支付課本、文具、校服及雜項費用，金額由最低一千三百五十元至最高四千一百三十元不等，按年級不同而有所區別。
不過，忠仔母親陳太對記者歎謂﹕「筆津貼根本唔夠用，淨係買教科書同補充作業都用咗唔少錢，好難有多餘錢幫細路仔買衣服鞋襪！」
暖流熱線
電話:29908688
傳真:23702192
電郵:
網址：