麥浚龍（Juno）出道以來一直被指靠父蔭，其父中建電訊主席麥紹棠前晚首度出席Juno於大學會堂舉行的活動，為愛兒撐場之餘更開腔力挺Juno，他表示兒子在內地知名度頗高，更說：「屋企有錢佢冇得揀㗎。」
麥浚龍前晚在大學會堂，舉行由商台製作的「有人與JUNO跳舞交鋒會」，其唱片公司環球共斥資六位數字製作，除環球高層及商台高層外，麥浚龍爸爸麥紹棠亦現身為兒子撐場，他更首次開腔力挺兒子，又為Juno的負面新聞解畫，盡顯慈父本色。
麥紹棠說：「我覺得一個年輕人作出咗好大嘅努力，有咁多人支持佢，做父母應該喺適當嘅時候出嚟支持佢，個仔比其他人練舞練得辛苦，我哋知㗎，佢攞咗個TVB8頻道嘅獎，香港觀眾同傳媒唔多清楚，其實佢喺內地知名度同市場都好大，比其他新人要高。」
Juno早前因工作過勞入院，問麥紹棠有否向環球高層陳少寶投訴？他說：「我想打電話畀陳少寶叫佢唔好畀咁多嘢Juno做，但Juno反對。」問到有否出錢替Juno作宣傳？麥紹棠說：「冇冇冇，我唔係呢行，Juno得先會畀人力捧，佢有好多贊助商支持，我只係默默支持佢。」
至於有指Juno以錢買職業fans，麥紹棠說：「公道自在人心，佢嘅fans係出自真誠，如果係用錢買fans，就朝九晚五嗌吓算啦，點會屋企成間房都係禮物，fans追車咁危險，買嘅唔會咁。其實屋企有錢對Juno係一種壓力，如果佢出自普通家庭就唔會咁，屋企有錢佢冇得揀㗎。」
另外，Juno前晚與女舞蹈員大跳勁舞，唱得興奮時，他還除去外套向台下歌迷大拋媚眼，其間fans不斷送禮，更有fans在混亂間被撞倒，幸無大恙。Juno看見熱情歌迷，忍不住眼紅紅，事後他說：「見到fans咁熱情好感動囉。」
採訪：汪正文 攝影：甄朝健