經常有人講新界樓深圳價，𠵱家就有現成例子，喺大嶼山度。曾幾何時以度假概念包裝，坐落芝麻灣半島二浪灣嘅澄碧邨，八十年代初係唔少城中富豪嘅至愛，但時至今日，市價已經跌至每方呎九百幾蚊。
近日報紙上有個業主自讓澄碧邨廣告，1050方呎，可租可買，開價一百萬元，呎價952元，連紅木家具，坐擁無敵海景，月租就只需千五蚊，每呎唔使個半！不過租金唔包管理費同差餉，根據紀錄，1050方呎單位每月管理費約兩千零蚊，正一妹仔大過主人婆，不過，計埋都係三千零蚊，呎租都係三個幾啫。
澄碧邨對外交通只有渡輪服務，去中環程船要成五十分鐘，另外有船去長洲，航程15分鐘。蘭西以前坐過，可能隻船細同埋撞啱大浪，感覺十足似玩激流。講到咁，大家都唔使心頭一涼，因為管理費包埋無限次乘搭渡輪，避世一定啱。
帝后華庭周末實際銷情始終係一個謎，禮拜六晚話預期會賣晒，點知噚日重係通街經紀帶客睇樓。由於聽講長實要員會出現解釋樓盤銷情，噚日一班行家冒着冷風，由三點幾就開始等，其間先向新世界負責人攞料，有行家話梁志堅前日都有出馬，果然重視此盤，負責人重話堅叔由下晝一直留守到夜晚，真係好堅咁話。大家傾呀傾，料都攞晒，但重未有實際銷售數字，發展商高層最後竟然甩底，究竟點解會有咁嘅誤會呢？真係同個盤嘅銷情一樣令人費解。
𠵱家交物業印花稅，繳稅人或者係佢嘅代表，要將文書正本或證明文件親自送去印花稅署，等署長搞掂份申請表，同確定收到印花稅款後，先至會發出印花稅證明書，要六個工作天。
遲啲就唔使咁麻煩嘞，因為政府建議推行電子加蓋印花方法，即唔需要繳稅人或代表親自送啲文件去印花稅署，由遞交申請表到收到印花稅證明書，全部都可以透過電子方式搞掂。繳稅人士重可以慳番啲影印、核證同派遞等費用。
有關物業買賣同簡單租約（佔整體嘅九成），都可以用呢個方法攞印花證明書。不過，呢個建議最快要04年中至實施，𠵱家重要大家忍耐吓！
市區矚目大盤上環帝后華庭上個拜禮六開售，結果情況同前周六首次內購時一樣咁混亂，部份有意買樓嘅人重怨聲載道㖭，聽吓佢哋嘅心聲就知係點嘞。
有個西區街坊，諗住再睇吓個示範單位至決定，點知啲職員同代理起勢咁催佢揀樓先，搞咗好耐都睇唔到，激到一肚氣，惟有罷買，呢個情況重唔係個別例子。蘭西當日見有代理喺街度同行家呻，遲遲都未有得揀樓，啲阿公阿婆等到攰晒，夜嘛嘛重喺代理嘅分銷中心等叫籌號。
發展商嘅賣樓手法，係唔畀時間買家慢慢諗，即係一埋枱就要揀樓，搞到好似要搶先有咁款。呢啲都係近排新盤促銷嘅必殺技，咁嘅情況，𠵱家買樓小啲定力都唔掂。
大時大節已經成為發展商以優惠賣樓的最佳藉口，估唔到𠵱家連出租住宅都用埋呢招。信和嘅北角寶馬山花園，租客喺今個月內承租，有一萬蚊搬遷津貼。聽講今次為賀聖誕而推出的優惠單位有四十幾個，至於一個月住客會所晚餐券，就一直都有嘅。
究竟啲租金係點呢？畀啲例子大家做參考，好似12座18樓E室，992呎，月租兩萬三蚊；10座21樓B室，面積1068呎，月租三萬零五百蚊；若果要租四房嘅複式，5座1704呎要四萬三，五座1822呎就多啲要五萬蚊。
信和𠵱家重持有402個寶馬山花園單位收租。
物業管理公司𠵱家提供嘅服務真係愈嚟愈好，聽講將軍澳一個由新昌管理嘅居屋，最近提供多項新服務，包括深夜接送、代填長者卡申請表格、大型郵件寄存、更換郵箱鎖膽、代客本地傳真、代售郵票，以及借用小型工具、手推車同雨傘等，直情係酒店式服務，睇完係咪覺得服侍周到呢？不過蘭西聽行內人士講，呢類服務都幾普遍，甚至連公屋都有深夜接送服務㖭。
其實物業管理公司不斷增值，反映行業競爭激烈，唔走多一步，好容易畀業主立案法團終止管理合約，到時要諗安置班夥計重頭痛。
蘭西
電郵地址：