孫九招出街之後，地產市道有些少起色，但真正復甦似乎仍未係時候，大地產商為求散貨，出盡九牛二虎之力，好似皇后街個大盤帝后華庭，搞到一頭煙都去唔晒，同荷里活華庭差天共地。
八方噚日去尖沙嘴擎天半島睇樓，呢個盤係九倉嘅，但在售樓處卻遇見新地一班要員，佢哋一行八人，帶頭嘅係新地副主席郭炳江，尾隨有黃植榮、雷霆、蘇仲強、周國賢、嚴道傑、胡茵芬、陳秀賢，咁大棚人到九倉地頭搞乜？
江少話：「人哋做得咁好，梗係要嚟參觀一吓！」細問之下，原來佢意思係話要觀摩一吓千六呎至千八呎中價豪宅嘅銷售情況。又好難怪江少咁緊張，皆因佢哋明年有兩個中價豪宅盤推出，即何文田山道一號同地鐵九龍站三期，𠵱家賣樓同以前唔同，少啲準備都唔掂，所以連新地咁叻賣樓都要備戰。
講開八方又記起，新地好似對九龍站擎天呢個盤情有獨鍾，記得擎天第一期開賣時，新地高層都有到場參觀，可能因為新地喺九龍站有發展（三、五至七期），所以就算係行家嘅嘢都着緊啲囉！
（圖）郭炳江（左）到場觀摩，九倉助理董事黃光耀自然一盡地主之誼招呼吓。
傳真︰2623-9278
電郵︰