秋風起，三蛇肥，邊三種蛇最肥我就唔知，但我知道深圳有一間酒樓，他們的大廚就最鍾意用過山風、飯鏟頭同銀環蛇呢三種肥美毒蛇來炮製三蛇羹，就連我唔好蛇的都要試一試毒蛇羹是何種滋味。除毒蛇羹外，呢度重有各種珍貴補品好似海馬、雀鳥、鹿尾羓，補得刁鑽，難怪大有捧場客，你又有無興趣試試？
記者：黃希知 攝影：小王子
唔係見到招牌寫住大酒家三個大字，我重以為自己入錯隔籬間酒店，其大堂的設計，高貴華麗夠氣派，寬敞的走廊兩邊掛滿老闆自己的大相和與多位影視紅星的合照，豪裝得來又帶有摩登的感覺。酒樓共有兩層，樓下是偌大的大堂，樓上是不同大小的貴賓房，其中有一部份房間更裝有落地大玻璃，透過玻璃可以盡覽樓下的熱鬧場面，企在玻璃窗前向下望，高高在上，有大地在我腳下的感覺。
起初對三蛇羹沒有太大興趣，但聽經理說是用上三種不同的毒蛇炮製後，即時興趣大增，大廚話：「過山風、飯鏟頭同銀環蛇三種毒蛇的肉味都較濃，尤其是銀環蛇，將三種肉混合做出來的蛇羹會比普通的更濃郁。」除蛇肉外還加入薑、胡椒根、冬菇、木耳、甘蔗等配料熬足七個鐘，甘蔗可用作減低湯的燥熱，這是中山傳統的製法。呈奶白色的蛇湯非常香濃甜美，蛇肉鮮甜，口感與肉絲相似，一點都不覺腥，經理表示蛇羹可以有暖身作用，畏寒的人食就最啱，冬天一日可賣出三十煲。
「好多客都鍾意食蛇羹，蛇羹是沿用中山石岐的傳統烹調方法去做，香港嘅蛇羹打咗芡，令湯變得濃稠，我們則是用蛇肉熬成濃湯，每日凌晨四時開始煲到早上十一時，所以湯味特別濃郁。」總廚顏師傅表示。
食雀仔會唔會有點殘忍？我起初都有少少抗拒，但後來知道一品雀鳥其實是水雞、水鴨、斑鳩、鷓鴣、鵪鶉，咁都無咁驚！隻隻斬件後望落同乳鴿無乜分別，雀鳥肉質嫩滑又滋補，大廚會用自家秘製的家鄉醬汁，用炮製啫啫雞煲的爆燜方法烹調，食時會有火爐熱着，每煲重會跟生菜一碟，顧客食到最後可以將菜放入濃香汁料內滾一滾，咁就連汁都食埋。
「好多時都會嚟飲茶，以咁嘅環境嚟講，價錢都算OK，呢度啲湯同燉品味道冇香港咁濃，質素好過香港，價錢亦比香港平，算係真材實料。」
燉湯之中，這款都算是最刁鑽，事關每盅都會用蒸餾水代替水喉水，「深圳的水喉水帶有一陣漂白粉味，用蒸餾水代替，燉出來的湯味道會清香得多。」大廚顏師傅表示。海馬最適合用來作秋冬進補之用，配合螺頭、赤肉、黨參、紅棗、薑片及老雞燉足三個鐘，有滋陰補腎作用，一隻隻海馬在湯中浮沉，你會唔會想試試？
重以為又牛鞭又雞子就實係男士之選，原來唔少女士都是其捧場客，經理解釋牛鞭同雞子其實男女都啱食，極具滋補作用。牛鞭先以薑葱、八角、草果等以數小時扣腍，最後加入大粒新鮮雞子、川芎、紅棗、薑片以上湯煮一煮，最後以少許花雕酒吊味，趁熱騰騰時揭蓋，陣陣酒香撲鼻而來，酒味點到即止，不會因過多而變得辛辣。
鹿尾羓、巴戟、杜仲、鎖陽全部藥材都有活血、滋陰壯陽的作用，用三個鐘燉，燉出來的湯不會太燥，大廚再加入赤肉令湯更鮮味，不會過於偏重於藥材味。雖然如此，但對於我來說，湯味始終有頗重的藥材味，同我一樣怕藥材味的話就唔係好啱口味啦！
環宇海港大酒樓
電話：(86)75525573168
地址：深圳市紅嶺中路1002號
營業時間：上午7:30至晚上10:30