十二年前，一個豬骨煲將澳門同香港兩地三個命運不同的人聯繫起來，三人的相遇不但令他們成為好朋友，更將澳門地道的豬骨煲帶入香港，同一條街六個月內連開四間舖，一個晚晚爆場豬骨煲傳奇由此展開。
記者：陳冰麗
攝影：陳盛臣、黃子偉
豬骨煲本身不是甚麼名貴菜式，由於材料便宜，因而成為澳門黑沙環一帶勞工階層的至寶，主要材料除豬骨及胡椒外，還包括大蒜、粟米、唐芹、蘿蔔等等。
搞電腦網絡工程的澳門人Dando、金融財務顧問香港人Andy及電腦遊戲監製Martin，本是風馬牛不相及的人因生意相聚一起，一日從Dando的家族在澳門經營豬骨煲食店飲酒，Martin突然提到將食豬骨煲的興趣變成一門生意，但苦於當時三人都有各自的工作，最後還是擱置下來。直至大半年前，Martin因工作未如理想，三人再度相聚飲酒食豬骨煲時，Martin重提搞豬骨煲的念頭，估不到三人原意一致，於是立即坐言起行。
雖然三人都未曾搞過食肆生意，但有Dando家族做正宗豬骨煲作為後盾，Martin聲稱在逆市開舖一點也沒有擔心過。可是事與願違，開業初期已經大失預算，最初7日勁蝕，Martin想起都驚：「開張一個星期只有兩枱客，我哋三個都唔知點解，惟有死守落去，希望有轉機。好彩因為我哋嘅固執，第8日開始，生意逐漸有起色，由原來兩枱客加到八枱客，總算有啲安慰！」
由於打住正宗澳門豬骨煲的招牌，食客們一個傳一個，其後幾乎晚晚爆場，熟客經常投訴等枱等得耐，於是開始擴展版圖，六月間於同一條街道上連開四間，其中一間打通兩舖，家陣至少可容納四、五十枱客。我第日另約朋友前去幫襯，未到七點已出現人龍。
除了增加枱數之外，他們還特地由澳門請多三位師傅去炮製豬骨煲，由於大量需求，三位師傅一晚要處理500斤豬骨，差不多等於三十隻豬。為了保持質素，豬骨同湯的比例是一比一，用的是新鮮豬骨，絕對是真材實料。
內有西施骨、豬手骨、豬脆骨及豬筒骨，最過癮是食豬筒骨，來自西伯利亞的粗豬骨，膠質較重之餘，骨頭內藏滿骨髓，只要用飲筒一啜，滑溜的骨髓直入喉內，奇香無比。
澳門出名咖喱香，葡式咖喱以香不太辣為特色，Martin話澳門都沒有，經他們大廚改良過，咖喱沒有愈滾愈稠情況，相反愈食愈香，椰奶味不太濃，是另一選擇。
食骨煲之外，亦有其他火鍋配料選擇，以竹子盛住的鮮牛滑，用人手打製鮮牛肉，又滑又香，是這裏特色之選。
第1間舖：杉樹街2-16號金基大廈6號舖
第2間舖：杉樹街22號
第3間舖：杉樹街9號
第4間舖：杉樹街2-16號金基大廈5號舖
骨煲皇
電話：23804441
營業時間：6:00pm-5:00am
付款方法：只收現金