八方上星期寫過港台訪問港交所行政總裁鄺其志嘅部份內容，前晚訪問正式播出街，八方不少朋友都特登聽埋呢個節目先至入睡。其實鄺總裁除咗講同老婆點恩愛，重有講佢對仔女。八九年鄺總裁當時重係AO，被調派往倫敦出任駐英副專員，就帶埋仔女去當地升學。當時，大女讀中二，細仔讀小五。雖然鄺總裁喺倫敦只做咗三年，但仔女就一路住喺嗰邊，讀埋大學先返香港。鄺總裁話，大女𠵱家做市場推廣，細仔就做電腦相關工作。
鄺總裁原來好重視仔女嘅教育。佢話以前老婆本來有份工，但細仔出世後，佢認為仔女教養唔應該交由工人負責，因此與老婆商量後決定男主外女主內，結果老婆犧牲事業。佢𠵱家同仔女感情好好，甚至近年佢想學唱歌都同仔女鍾意唱歌聽歌有關。佢話會同仔女一齊唱卡拉OK，細仔鍾意陳奕迅，較早前更教爸爸唱hit咗一輪嘅《ShallWeTalk》，你話鄺總裁點會out？
﹙圖﹚鄺其志同一對仔女感情好好。
傳真︰2623-9278
電郵︰