二十三條惡法就快殺到埋身，有關嘅怪事亦層出不窮，除咗最近反二十三條立法遊行橫額無故被拆外，立法會議員劉慧卿都有一次奇遇，搞到佢忍唔住寫咗封信畀浸大校長吳清輝投訴。話說佢早前出席浸會一個二十三條論壇，一到校園，就有個保安人員貼身服侍佢，連去廁所都陪住，令佢感到周身唔舒服，後嚟又聽到啲學生話啲海報俾人撕走，覺得真係要問吓校方，乜嘢咁大件事。
不過怪事又唔一定係壞事，好似最近喺報紙雜誌大版大版出現嘅一個廣告，呼籲大家十二月十五日下午三點，去維園音樂亭集合，參加反二十三條立法大遊行，就係一個謎。主辦遊行嘅民間人權陣線一向窮到燶，為何忽然富貴，有錢大賣廣告？人權陣線中人私下同八方講，廣告係一個佢哋都唔識嘅神秘人所登，雖然時間地點正確，不過關於組成陣線嘅團體資料稍有失誤，之但係佢哋都想借此機會，向呢位神秘熱心人士表示感謝，亦請各方團體多多包涵。
傳真︰2623-9278
電郵︰