沙田陳師奶到沙田商場，見到有CD舖賣國語金曲CD，包括吳鶯音、白光、周璇嘅名曲，十分吸引。價錢更吸引，每CD只售二十元。陳師奶問店員：「係唔係翻版嚟㗎，咁平嘅？」店員話：「假貨翻版貨就賣六七蚊一隻啦，我哋絕對賣正貨，正版，你大可放心。」陳師奶於是買咗兩三隻，返屋企聽一聽，都幾滿意，再睇吓說明，上面寫住「台灣××公司授權，中國××公司印製。」好似真係正版噃，既然得到授權，中國啲成本咁低，賣二十蚊好合理啫。
陳師奶當日下午出中環，置地廣場內碰到左丁山，介紹左丁山買平價靚CD。左丁山心諗，HMV又唔見有咁平嘅CD？於是打電話問唱片界總裁唱片G，唱片G即刻媽媽聲：「呢啲老牌大歌星嘅金曲，絕對冇授權中國公司印製，甚麼台灣公司更從來不曾擁有吳鶯音、白光、周璇嘅版權。據我所知，百代唱片（EMI）先至係版權擁有人，佢哋係大公司，世界知名，點會直接或間接授權中國出版咁便宜嘅唱片吖，搬石頭打自己腳咩。」
唱片G所言有理，EMI冇理由同自己倒米啫，但市場上既然有平貨公開發售，EMI又似乎無可奈何噃，睇嚟可能有人找到法律罅，打合法茅波，搵真銀。中國人做生意，頭腦精靈到極，乜都識轉彎，可惜就係唔識尊重版權啫。