港股上個禮拜又跌番落10000點樓下收市，雖然話跌到嚟呢個水平，開始有啲買盤出嚟托住個市，加上誠哥同彤叔個上環地盤又賣得幾好，地產股理應有番啲睇頭，不過有個同班鬼子佬好熟嘅朋友同伏勝講，話班芬佬已經唔係好信地產佬同孫九招嗰套，所以喺上個禮拜美股跌市嘅時候，就向地產股開刀。更有市場傳聞話有幾個「芬」打算喺年底後將手上嘅地產股清倉，如果係真嘅話，今鋪港股隨時會唔見多1000點。
上個星期啲股仔已經無晒睇頭，點撥都無火到，喺市場恐慌情緒下，有乜風吹草動都會令到氣氛變得好緊張。
上周，聽個經紀朋友講，有個大戶揸咗好多香港藥業（182），周圍問啲經紀行搵倉按，話只係按兩成就夠，不過由於啱啱先有兩隻股仔爆煲，好多經紀都為咗保住自己，就算有生意送上門都唔敢做。𠵱家做經紀隨時會因一單嘢而搞到全軍覆沒，真係進退兩難。
至於可以博吓嘅股仔，伏勝首推文傳（343），市場話早前賣咗五成一中文2000軟件股權嘅文傳，似乎又有嘢要搞。聽市場消息講，佢哋將會獨力發展一套中文移動通訊器材嘅作業平台，由於佢哋有中文電腦之父助陣，加埋國內對手機嘅需求非常大，要成功發展新一代作業平台其實唔係難事。重話咁啱國內又有一隻叫紅旗Linux嘅股將會喺出年年頭嚟香港上市，由於佢哋作價會比較高，喺水漲船高下，文傳同樣有着數，所以班大戶點會唔做番啲嘢嚟賀一賀佢。各位不妨留意隻股之後嘅表現，應該可以有機會執番十零個巴仙。
伏勝