已經退役嘅跳水女王伏明霞，雖然𠵱家貴為香港財政司司長夫人，不過佢連奪四面奧運金牌嘅歷史，大家一直津津樂道；噚日，喺小伏之前，八十年代中國第一位奧運跳水金牌得主周繼紅嚟咗香港參加一個青年領袖對談會，同幾百位香港中學生分享面對逆境嘅經驗。
唔知係咪跳水場上特別多美女，小伏唔在講；十八歲就奪得八三年世界盃十米高台冠軍，十九歲再獲八四奧運跳水金牌嘅周繼紅，當年都係不少中國人心目中嘅偶像。噚日佢風采照人，台下一位女學生問問吓問題，都忍唔住大讚：「周小姐，我覺得你好靚呀！」
周小姐原本同小伏關係都好密切，覺得小伏對跳水特別有悟性，九八年佢接手做國家跳水隊領隊後，兩年時間帶領包括小伏在內嘅隊員，奪得奧運跳水五面金牌。不過佢話因為工作好忙，已經好耐冇同嫁咗嚟香港嘅小伏聯絡，今次亦來唔切通知佢。八方惟有希望小伏見報，可以同恩師聯絡敍吓舊。
（圖）學生好有興趣知周繼紅鍾意做運動員定領隊，重好似見明星咁要求簽名。
傳真︰2623-9278
電郵︰