向來以前衞造型示人嘅奧迪A6車系，廠方現正計劃於2004年，推出全新第6代型號。據知新車嘅鬼面罩，會仿照30年代奧迪36TypeC為藍本，誇張嘅賣相會給車迷留有深刻印象之餘，多採用鋁合金製嘅車體部件，會令車重減輕多100kg外，前後軸距亦會較現行擴大，務求跟同級嘅平治E-Class，又或者係寶馬5系爭一日之長短；懸掛系統仍維持前輪四連桿，後輪多連桿組合，惟匹配新加入液壓式轉向系統，相信會有更佳操控性。再者，新A6會以全線Direct-Injection（FSI）引擎為主導，標準版為2.0公升直4偈（馬力150匹），另有V6（馬力245匹）同頂級4.2公升V8偈（馬力335匹）組合，或許響2005年更會有5.0公升V10（馬力500匹）型號面世。新車會以6前速手波及自動波，或MultitronicCVT波箱作選擇，除前輪驅動型號，重有Quattro恒式四驅版本；四門版可望於2004年底推出，而五門Avant則會在2005年面世。