張衞健、梁漢文、李燦森同葛民輝噚日喺沙田出席「齊天大聖孫悟空之美猴王與你迎聖誕」活動，現場超過七百幾人圍觀，有近五百個都係小朋友，好鬼熱鬧。
大家重記唔記得馬騮仔金鷹，佢跟住個男人一齊出嚟，不過個男人唔係陳伯。金鷹跳咗上張衞健個膊頭度，見到現場咁多人，佢緊張到幾乎標臭臭，最後都忍唔住瀨咗少少，佢一瀨就跳返去主人度，所以啲臭臭都喺主人度，張衞健都算好彩。
張衞健早前同許志安去泰國旅行，俾人影到佢有大肚腩，佢噚日講笑咁話：「我要鄭重澄清，嗰個唔係肚腩，係胸肌，只係範圍大咗少少啫，大概二十到尾唔到三十吋左右啦。」許志安喺另一個活動話健仔肥得可愛，健仔竟然抗議話：「係弗得可愛，弗到跌渣先啱。」
此外，郭秀雲同傅明憲噚日出席維園「寵物嘉年華」開幕禮時，郭秀雲帶埋澳洲鸚鵡Gigi亮相，佢重讚Gigi識講菲律賓話，又會扮電話聲叫醒佢。點知Gigi突然屙臭臭，搞到郭秀雲件衫污糟晒，郭秀雲一臉尷尬咁話：「本來畀佢着尿片，不過好核突，咪除咗，下次都係要佢着尿片出街。」
何韻詩、Cookies同埋Shine噚日去咗大埔超級城，同成班香港基督教女青年會嘅會員，用咗五千個膠樽搭咗一棵二十呎嘅環保願望樹，挑戰健力士世界紀錄，而第五千個膠樽，就由何韻詩企喺吊臂升降台度掛上去，原來何韻詩本身有少少畏高，佢話好驚，不過都好開心，為咗做善事冇計啦。
劉燁前晚去銅鑼灣中央圖書館出席第二十五屆法國電影節。劉燁將會同黎明合作拍關錦鵬執導嘅《奪情天》，講到黎明拒拍床上親熱戲，劉燁就話：「我沒有所謂，《藍宇》也拍過。」
問劉燁會唔會教黎明演戲？佢就話：「他是前輩，都是請教導演。」劉燁下個月還會同林嘉欣合作一部《Truth&Dare》。問劉燁有冇祝賀黎明同林嘉欣奪金馬獎？佢竟然話：「我上次來香港有見過他們，我為他們帶來好運。」
周杰倫今個星期四喺紅館舉行五場演唱會，門票一早就賣晒。周杰倫原先打算搵張學友做嘉賓，因為學友係佢嘅偶像，周杰倫之所以會創作流行音樂，都係因為俾張學友嘅歌影響。
點知學友因時間問題拒絕咗，周杰倫就話請唔到學友，就情願佢自己一個人唱晒喎！其實學友因為下個月開個唱，之前唔想演出太多，加上佢又推咗做陳奕迅個唱嘉賓，所以就推埋周杰倫。
章子怡噚日喺尖沙嘴出席活動，漫畫家馬榮成送咗一幅畫咗章子怡個樣嘅漫畫畀佢，章子怡重問馬榮成可唔可以收佢做徒弟？點知馬榮成拒絕咗佢話：「我唔係好老師。」章子怡當時就好鬼尷尬。而佢逗留咗十五分鐘，未接受訪問就急急走人。