名牌即係名牌，中環威靈頓街嘅著名酒家──鏞記酒家獲獎無數。最近，佢哋嘅菜式「紮蹄」重做到「點石成金」㖭。呢道菜式認真犀飛利，喺旅發局搞嘅「二○○二美食之最大賞」中，奪得豬肉組嘅「至高榮譽金獎」，靠「紮蹄」嘅威名，再配合埋招牌燒鵝，鏞記生意興隆唔在講，接受日本遊客嘅定單，竟然已經排到二○○四年，都咪話唔誇張。
「紮蹄」可謂一朝奪獎，聲價百倍。除咗搖身一變成為旅發局新推出嘅《二○○二美食之最大賞指南》中重點推介的菜式外，鏞記嘅王經理話，本來「紮蹄」唔係咁多人點，但得獎後就大受歡迎，由每日做三十碟大幅增加到一百碟。
唔單止鏞記嘅「紮蹄」，其他獲得旅發局金獎嘅食肆好似怡東軒中菜廳、同樂軒，以及南北和小廚嘅特色菜式，營業額均明顯增加，得獎的菜式點菜率都大增，其中怡東軒中菜廳重用得獎菜式，組成特別餐單㖭，認真有諗頭。
（圖）鏞記酒家嘅馮浩棠師傅，憑「紮蹄」奪得豬肉組嘅「至高榮譽金獎」。 黎樹雄攝
傳真︰2623-9278
電郵︰