如果𠵱家問啲英國男人覺得邊個女星身材最正、最性感，我羅拉估唔少人都會話係澳洲女歌手KylieMinogue同佢個同鄉勁敵HollyValance；不過，如果將呢個問題問番Holly嘅話，佢嘅答案就係樂壇天后麥當娜（Madonna）喇！
呢位十九歲卜卜脆嘅澳洲女歌手自從去咗英國發展後，啲英國男士真係個個都昅到佢實，皆因佢嘅衣着經常都鬼咁惹火，又低胸又比堅尼，佢重試過喺佢首歌嘅MV入面有裸露演出㖭。
但係唔講你唔知，原來阿Holly呢啲咁性感嘅表現，都係拜娜姐所賜。
Holly話佢除咗係跟娜姐學嘢之外，佢又大讚四十四歲、已經係兩個細路媽咪嘅娜姐身材勁索，讚佢個胸係所有藝人之中最正嘅，Holly重話好欣賞娜姐千變萬化嘅形象，直情讚到佢前無古人後無來者咁滯。
不過我羅拉都要講番句公道話，八十年代嘅娜姐真係當時大部份男士嘅性感偶像，佢嘅形象性感得嚟又夠激，相信𠵱家已經三、四十歲嘅男士都會好認同Holly嘅說話！