經紀黃10月時曾問小初點睇松日通訊（283），小初當時覺得新大股東與舊大股東關係微妙，所以唔敢亂掂。噚日見到經紀黃，佢舊事重提，話隻股似乎開始有搞作。
松日10月頭先舊後新配股，定價每股0.20元，集資2256萬元，其後股價升至最高逾0.40元，但上個月則一度回落至0.25元左右。不過近排隻股明顯重拾升軌，噚日微升1.47%，收0.345元，但成交仍然疏落，反映只係有人出嚟維持秩序。
經紀黃話，松日噚日公布用5500萬元現金，收購一檔在大連生產消費電子產品嘅工廠，反映新主已經開始做嘢。但小初唔係咁諗，單deal睇落唔覺得好正，皆因間廠新簇簇，重未有錢賺，兼且賣家又無提供盈利保證。
不過，若純以炒賣角度睇，炒作理由其實唔重要，只要有水就可開車，近排大陸資金湧入港股，有關係股仔可以輪流炒。
慕容小初