金耀基正式就任中大校長，連恒生銀行大班鄭海泉都要讓路？原來中大噚晚喺恒生總行頂樓博愛堂宴請新校長同埋新一屆嘅榮譽博士，鄭大班雖然準備咗請客，亦一於成人之美，將個場讓咗畀中大校董會主席利漢釗，等佢哋同金校長佢哋慶祝，鄭大班自己就出街再搵地方食飯。
其實中大同恒生數有淵源，恒生名譽董事長利國偉長期為中大校董會服務，並為首任司庫，獨立非執行董事利漢釗又係中大校董會主席，鄭海泉於中大畢業，掌管博愛堂之張樹槐，亦係中大人。
自李國章八月過檔政府，加入中大三十幾年嘅金耀基臨危受命，九月起已經出任中大第五任校長，前日佢正式就職，致辭時真情流露，話雖然同其他校長好唔同，唔會有長遠目標計劃，不過一日係校長，一日都會做中大校長應做、需做嘅事。
噚晚博愛堂有近百人到，中大校董之一張文光太忙冇到，講起搵新校長嘅進展，張文光都話好頭痛，人才唔易搵。有知情人士同八方講，家陣中大同科大嘅合併計劃唔知做唔做得成，假若成事，朱經武將會係合併後嘅校長熱門人選，所以金耀基未必可以如期退休，可能要做多幾年，將棒直接交到朱經武手先叫大功告成。
（圖）利漢釗夫婦（左一及二）日前同新校長金耀基夫婦來一個合照。
傳真︰2623-9278
電郵︰