男女藝人因為合作而戲假情真呢樣嘢成日都有，但係好多時佢哋都怕會嚇親fans而唔敢認，最新例子就係上緊位嘅坂口憲二同小雪嘞！
可能重有讀者會問佢哋係乜水，但係當你知道坂口下個月會同松隆子扮情侶拍日劇撼木村拓哉、同埋小雪會喺荷李活電影《TheLastSamurai》入面扮湯告魯斯（TomCruise）女友之後，相信大家都應該知佢哋勁啦！坂口同小雪早排合演日劇《天體觀測》而發展成情侶，最近重俾最新一期《Friday》雜誌影到佢兩個同小雪嘅家姐食飯，之後一齊返坂口屋企過夜㖭！但係佢哋𠵱家當紮，惟有死口唔認，透過事務所話只係朋友喎。而原本噚日坂口同松隆子套劇嘅記招，亦因為今次緋聞而取消，你都咪話影響唔大。
咁啱另一對俾人影到相嘅安西纊子同CHEMISTRY成員川畑要，態度就相反，佢哋不嬲形象花弗，今次俾人發現復合最多咪話：「我哋好番啦！」