經紀李晨早打電話嚟，問銅鑼灣有冇舖位好介紹，原來佢有個客租開舊總統戲院附近個地庫商場，想喺農曆年前搞掂搬舖。嗰度有乜唔好？個場夠晒集中，好多𡃁仔行完耀華街，再落波斯富街，直落地庫商場再返轉頭去Sogo，此路線已成銅鑼灣街頭型人指定動作。
經紀李：「個地庫場唔係唔好，不過唔知係咪我個客運滯，定係個場唔夾佢八字，佢經常喺嗰度遇上濕滯嘢，幾年前搬入去，有幾間寵物店，搞到個場一陣除，趕走唔少客人，後尾其他租客投訴得多，寵物店終喺壓力之下搬走咗。以為會雨過天青，點知就遇上第二個難題，就係場內間唔中就水浸，因為地庫關係，一遇上黑色暴雨，雨水有如洪水氾濫沖入場內。早兩年最勁一鑊，豪雨下全個場浸清，唔少老闆仔見到自己啲貨在水中漂流，只有一殼眼淚。最近唔知咩事，又浸多鑊，我個客賺埋都唔夠畀清理費喇，所以趁過年前搬就一了百了。」
唔揀地庫商場，銅鑼灣只剩番駱克道上樓舖可揀，但樓上舖屬虛火，租金同人流不成正比，最終經紀李勸個客忍吓手先，呢啲環境宜守不宜攻，惟有求教於風水師傅，睇吓有冇後天方法補救？
主持人：大食Jack
八卦熱報：