狀師金位身材高大公子讀國際學校，學校搞家長學生「親子活動」，來一場周日足球友誼賽。狀師金乃昔日足球健將，喺大學時代成個今日嘅舒利亞咁款，打中鋒衝鋒陷陣，撞到友校啲中堅失魂。大狀今時今日雖然冇氣冇力，狀態差過四十歲嘅米高佐敦，但同啲細路仔踢波，自信仍可頂得兩嘴，於是與子同場踢波，預備交兩腳靚波畀個仔，等佢走番兩段，高興吓。
落到場，對方球員除咗一兩位家長之外，竟然有一個大隻佬，年紀大過學生好多，但亦細過晒啲家長，唔通係學生嘅大哥？狀師金細細聲問乖仔：「嗰個係乜嘢人？」乖仔話：「日日返學都見到佢，佢係陪F仔返學嘅。」哦，F仔就係F公子嘅乖仔，F老爺嘅乖孫，一家都係名人。陪F仔返學嘅人，一諗就知係保鑣。F仔同阿媽久唔久就到陸羽飲茶，確係需要保鑣保護。
賓架陳位公子亦就讀名校，某日成班同學約埋去玩，同學之中有一位H公子，老竇係大名人也。約會之期嘅前一日，賓架陳收到H辦公室秘書嘅電話：「請問陳先生，陳公子約咗我哋公子同一班同學去玩，有無其事？係唔係去XX商場？之後又去YY餐廳？」賓架陳其實唔知自己個仔會去邊度玩，唔識答。對方即刻好緊張，請佢回電confirm。賓架陳先至知道，現在富家子弟啲保安措施幾嚴密，子女行動有專人監控，依足程序辦事！