薛家燕（好姨）、梅小惠同姚樂怡等一班無綫劇集《皆大歡喜》嘅演員，前晚拍完煞科戲，就喺筲箕灣食飯，好姨一時興起，重即場同阮兆祥、劉愷威、林文龍、謝天華、洪天明同鄧兆尊六位男藝人上契，榮升做佢哋嘅契姐㖭！
話說好姨前晚講笑咁話，如果《皆大歡喜》六位男演員唔介意稱呼佢做契姐嘅話，就可以上契，於是佢哋就輪流斟茶畀好姨，而做人契姐嘅好姨即場大派利是，不過為咗好意頭，多咗六個契弟嘅好姨話唔會有四弟同七弟喎。喺上契儀式進行期間，「老薑攝石人」蕭亮重走上台攝位博影相，要勞動無綫製作部副總監曾勵珍開咪請佢落台，真失禮！
提起上契，早幾日有傳聞話好姨認咗廖碧兒做契女，不過佢前晚話：「冇呀，佢媽咪早排係送咗禮物畀我，其實自己都一大竇仔女，所以都冇諗住上契！」而前晚嘅飯局，藝員每人磅水五百蚊，不過趙學而就畀五千蚊，其餘由好姨包底。
陳慧琳（Kelly）成功打入日本市場，佢早排重被選為最佳衣着名人之一，證明日本fans相當欣賞Kelly。前幾日Kelly就去咗東京嘅PlanetHollywood餐廳，出席餐廳一周年慶祝派對，Kelly獲邀主持切餅儀式，結果吸引咗當地二百名Kelly嘅fans到場，亦有好多日本嘅傳媒到場採訪㖭。
李嘉欣五十歲嘅堂兄李米高（MichaelReis），今年九月四日喺澳洲悉尼公路上懷疑俾佢三十九歲嘅分居太太瑪蓮殺死，有關案件前日喺悉尼地方法院進行初級偵訊，被裁定表面證供成立，被告暫時毋須答辯，還押監房看管，到出年二月七日再轉解最高法院審理。
王力宏早排嚟香港拍攝無綫特輯，佢除咗騎馬拍外景之外，重有機會去大牌檔品嘗美食，以前從未試過去呢啲地方食嘢嘅王力宏話，試過之後對其他食物冇晒興趣，甚至呼籲香港政府一定要將呢啲大牌檔特色保留喎！王力宏話：「炸乳鴿好食到不得了，今次來香港給我很大靈感，很想在下次大碟中加入這些題材。」
張燊悅噚日以一頭短髮嘅造型現身商台，幫廣播劇《落入凡間的天使》錄音，對於自己嘅全新形象，張燊悅都幾滿意，只係起初有啲唔慣啫！問張燊悅俾賀歲片《老鼠愛上貓》飛起，會唔會覺得好尷尬，佢就話：「唔尷尬，係因為批文問題先會咁啫，導演話下次預埋我㗎！」