美股持續下滑，港股一度跌破9900，低見9890，投資氣氛即見呆滯，成交萎縮至50億元，港交所（388）今年只係冇花紅派，現有員工唔使減薪，真係應該偷笑。
一直都乏善足陳而成交又稀疏嘅麗新系，噚日見到有少少鑊氣，其中麗豐控股（1125）勁升28%，收報0.10元，成交增至134萬元。Cookie話，此股投資國內物業市場，其中以上海地產為主，最近上海獲得世博主辦權，因而吸引炒家入市炒番轉。此股資產淨值達56.8億元，以噚日收市價計，市值只有3.839億元，即市值較其資產淨值大幅折讓93.5%，計落都幾抵炒，不過市場對此系股份興趣一般，若能引入國內投資者，甚至股權易手，則可炒性會大大提高。
TCL國際（1070）噚日又出現一陣拋售潮，股價一度大跌9.3%，低見2.20元。市場傳出公司手機庫存極多，反映銷量可能放緩，但公司隨即作出否認。不過黑客同阿虎講，此股主要業務做彩電，國內彩電市場價格大幅下調，雖然公司有意以手機作為新增長點，但原先嘅捧場客無意改變投資策略，繼續因為睇淡國內彩電市場前景而減磅。近期此股每升近2.40至2.50元就出現頗大沽壓，可能呢個水平就係有關基金減磅嘅目標價位。TCL噚日最後收2.30元，跌幅略為收窄至5.5%，成交達8225萬元。
第一珍寶（073）近期一直在1.9仙至2仙水平徘徊，由於近日二三線股表現理想，幕後炒家技癢，終於將股價大幅踢高21%，睇吓有冇人敢跟，不過成交只得93.3萬元，散戶反應依然冷淡。
阿虎