美股唔得，港股跟埋跌，恒指一度唔見118點，收市唔係咁壞，只係下挫36點，期指跌幅更細，只係微微低水3點。恒指收9973，只要美股定住，港股收復萬點大關，相信冇乜問題。
紅籌指數冇跌，國企指數有得升，紅籌國企係一家，華創（291）近排窄幅波動，7元邊邊守得好穩，最低7.15元，收7.30元，有15仙進帳，吼住反覆之中，見低位時，把握機會買啲華創Call輪，對象係9270，昨收13.6仙，跌3個位。
近期好多Call輪，溢價漸漸收縮，9270明年9月夠鐘，大把時間，溢價7.1%，槓桿率5.4倍。候跌至13仙邊邊買入，14.5仙以上沽售，賺短線錢。
隻輪槓桿率唔算大，輪價波幅較細，唔似得其他槓桿率喺10倍以上嘅Call輪，郁吓即日高低已相差10%以上。
睇住恒指變化，有機會低位之時買啲恒指Call輪博反彈，對象係9553，呢件勝在溢價低而槓桿率唔細。
另1件係9552，呢件溢價高啲，槓桿率又大好多，贏同輸都放大好多。至於恒指Put輪，則唔值得博，昨日升幅有限，因住溢價收縮令輪價跌。
章盛