逢出必炒嘅任天堂招牌作《薩爾達傳說》，今次GC版亦唔例外，連日本預訂免費送嘅預約特典都炒到成400大洋，話時話今次任天堂將N64隻時之笛用特典形式送出真係賣大包，而正本戲《薩爾達傳說：風之指揮棒GC》就會喺12月13日-14日推出，有GC真係咪走雞。
文：打機鐵人
講開隻《薩爾達》預約特典，雖然出面炒到咁貴，不過Game舖得嚟都唔易，因為日本任天堂方面要求預訂嘅人除咗要畀2,000日圓外，重要填一張表格，包括姓名同地址，有啲舖頭就喺日本搵啲冇嘢做嘅少年去排隊，每隻碟有酬勞500日圓（維起港幣只係三十幾蚊），又因為每間舖頭唔可以有重複名字預訂，所以要搵成50個人走勻秋葉原、池袋、新宿各Game舖，先訂到三、四百隻，都咪話唔辛苦。
上星期日本遊戲界嘅大事非SQUARE同ENIX合併莫屬，事關兩大公司都擁有王牌RPG，前者係國際知名的《FinalFantasy》系列，後者有日本國民級的《DragonQuest》系列，合二為一後，這間超級遊戲開發商，絕對有能力左右遊戲主機的成敗。將來發展如何要日後才知曉，但香港方面SQUARE都有新聞，今個月SQUARE推出嘅《UNLIMITEDSAGA》同《KINGDOMHEARTSFINALMIX》，經代理EA爭取後終於有行貨推出，遊戲重會同日本同日發售，不過內容仍然係日本版，定價約$350左右。