梁詠琪（GiGi）日前遭一名自稱是其歌迷的廣州男子以電話和傳真恐嚇，勒索六萬元，梁詠琪經理人公司已報警求助，警方將事件列為刑事恐嚇案處理。
昨晚梁詠琪在三名公司同事陪同下，出席在荃灣舉行的「荃灣燈飾二十載萬眾同心創未來」亮燈儀式，大會特別安排兩名保安接送GiGi下車，連她上台時亦有三名保安護送，令同場的陳冠希和盧巧音相形下受到冷落。
梁詠琪昨晚說：「我同公司一齊知呢件事，但冇同屋企人、男朋友（鄭伊健）講，知道今日會見報，所以噚日先同佢哋講。勒索只係五位數字，唔係大數，我覺得只係有人為咗錢先咁做，唔係我得罪人，我上個月去咗廣州四次，曝光率高先至會成為目標。」
問梁詠琪可感到害怕時，她說：「初時有啲驚，𠵱家交咗畀警方處理就冇事，到𠵱家為止我都冇去警署落口供，未知使唔使去。」至於報警後對方是否有繼續勒索，GiGi則表示不知情。
問GiGi會否要求男友伊健陪伴在旁作保護，她即甜笑道：「你問佢啦，我唔使做嘢多數都會留喺屋企。媽咪知道之後都擔心，我之前唔講，就係唔想咁多人為我擔心。」再問GiGi可會聘請保鑣時，她說：「喺香港唔需要，呢個月我會留喺香港，暫時唔使去內地，所以未有咁嘅需要。」
採訪：陳梅香
攝影：仇志德