出晒名好有愛心嘅安琪蓮娜祖莉（AngelinaJolie），呢排除咗掛住湊佢個寶貝仔麥度斯（Maddox）之外，亦都忙緊拍動作片《盜墓者羅拉2》，不過我大口羅拉最近八到料，話正牌羅拉安琪蓮娜對講述色情電影《深喉》女主角蓮達露芙萊絲（LindaLovelace）生平嘅新片好有興趣，希望可以演呢個角色咁話。
蓮達係七十年代美國其中一個最出名嘅女人，佢部《深喉》過咗咁多年，到𠵱家仍然係四仔電影中最經典之作，可想而知佢喺部戲入面嘅表現有幾巴閉。而喺八十年代，阿蓮達姐重出嚟自爆話當年拍色情片完全係俾人威迫，根本唔係自願㖭！可惜佢喺今年四月因為交通意外逝世，終年五十三歲。
安琪蓮娜當然好有興趣扮演呢個咁傳奇嘅女人，有消息人士話：「安琪蓮娜想證明自己係好戲之人，雖然部戲未有導演，不過電影公司接觸佢之後，佢真係對呢個故事好有興趣。」其實計我話，安琪蓮娜連奧斯卡都攞過，個個都知佢做戲掂啦，不過如果佢真係做呢個角色，咁就真係大把男fans等住睇囉，事關一定有唔少裸露鏡頭嘛！