仙股事件後，港交所行政總裁鄺其志毅然辭職，但一直冇公開表白心聲，不過佢近日接受港台韋家晴訪問，聽晚會喺《男人之家》節目中播出，八方有幸先聽為快，同各位讀者率先分享。
鄺總裁好似已經收拾心情，喺節目中自爆話讀大學時開聖誕舞會，有個同學叫佢幫手搞音響，咁就識咗佢同學個妹嘅女同學，即係今日嘅鄺太。
鄺總裁話四年前想學唱歌，當時老婆想學跳舞，但佢唔肯畀太太跟其他男人學跳身貼身嘅拉丁舞；於是老公陪老婆學跳舞，老婆就陪老公學唱歌，就係咁學到𠵱家。
鄺總裁除咗鍾意唱歌，亦鍾意聽歌，但佢連聽歌都好有原則，除咗位歌手要唱得好，品行都好重要，所以佢最鍾意張學友。
講到仙股事件，佢話當時係有啲唔開心，因為報紙雜誌有啲文章人身攻擊，有啲批評唔公道，但有太太、仔女同朋友支持，佢話只要盡責同盡良心，做一啲應該做嘅嘢，就唔會因為嗰啲人身攻擊而冇心機。至於佢決定辭職時，並冇唔開心，「考慮完後覺得約滿離開，對各方面都最好。」佢聲稱仙股事件唔係佢直接考慮嘅因素，但就唔肯再多講，只係話返政府嘅可能性好低。
傳真︰2623-9278
電郵︰