利物浦龍門杜迪對曼聯屙蛋後，成為球壇笑柄；領隊侯利亞原本講明前晚聯賽盃對葉士域治會重用基克蘭，殊不知最後都係用杜迪，就令佢做埋贏波英雄𠻹。不過侯利亞突然轉軚，唔代表杜迪有希望，睇嚟杜迪已正式淪為應付非重要盃賽嘅龍門，要安心做佢嘅盃賽專家咯。
聽講杜迪響呢場波好爭氣，上半場救出兩個必入球，下半場亦左撲右撲。不過聽完侯利亞賽後番話，杜迪肯定食唔落飯。侯利亞話：「今次我出爾反爾，因為覺得畀多啲機會杜迪踢先至幫到佢重建信心；點都好，禮拜六對查爾頓同埋下個禮拜兩場波，基克蘭都會踢正選。」如果侯利亞唔再食言嘅話，恐怕杜迪暫時都無咩機會，鬼叫佢屙蛋咩。
布力般前日簽咗土耳其國腳蘇古，令隊中已有黑雙煞、贊臣、奧斯頓史達同埋基比（就快會被送走）嘅鋒線競爭更激烈；唔知係咪因為咁，所以約基同高爾響前晚聯賽盃大勝洛達咸時一改佢哋散漫嘅態度，表現不知幾勇，慌死無咗個正選位咁，重夾埋入咗三粒。查實任何球隊有良性競爭都會令球員踢爭氣波，對球迷絕對係好事。
阿特蘭大高層日前就警告班球員，話佢哋唔再爭氣嘅話，全部唔使旨意有糧出；有留意新聞嘅都知，按表現出糧呢家嘢響季前查實已經講過好多次，之不過班大球會高層全部都係得個講字，最後都係照出糧畀班球星。即管睇吓不嬲反潮流（例如專搞青訓）嘅阿特蘭大會唔會創先河嘞。
意大利盃繼續吹冷風，羅馬和泰利斯天拿都唔出奇，巴里贏埋國際米蘭就有少少令人意外；截至禮拜三為止，四隊殺入十六強嘅乙組隊都保不敗，真架勢。我求大俠已經唔止一次講過強隊唔重視呢個盃，淨係睇國米派半隊青年軍落場，就知捧唔過嘞，何況重要讓波。
比利時女網手史施達絲最近話為咗避開比利時嘅高稅率，考慮入籍澳洲；我求大俠覺得有啲奇怪，因為避開重稅嘅網球手多數都係到蒙地卡羅定居，點解史施達絲偏偏山長水遠揀澳洲呢？唔通避重稅只係藉口，佢同澳洲球手「世界一哥」曉域治好事近先至真？