恒指最低時跌55點，埋單有14點進帳，企喺萬點以上，總成交得49.26億元，大減24.84億元。睇多一陣，成交若然都係奀奀哋，則意味沽售壓力告一段落，短線博反彈。
睇住長和系，大市若然止跌，長和系Call輪不妨搵啲玩吓。長實Call輪例牌係9517，明年2月夠鐘，現價50仙，溢價5.4%，槓桿率11.2倍。和黃Call輪例牌係9518，亦係明年2月夠鐘，現價52仙，溢價5.4%，槓桿率10倍。穩陣計，吼低少少揸呢兩隻Call輪博反彈。
九倉（004）高低幅度25仙，平收16.75元。九倉Call輪9476高低幅度2仙，收30.5仙，跌1仙。隻輪明年6月到期，溢價縮到1.1%，槓桿率5.5倍，槓桿率雖然唔得爆炸，但勝在溢價低，值得揸啲，坐盤耐少少唔緊要，壽命長，唔怕輸溢價。
九倉Call輪9476相對變化唔大，但有啲仙輪，上落好快，例如中信Call輪9298，下晝初段當中信泰富（267）跌到15.10元之時，輪價得番4.9仙，尾市正股上番15.25元，彈幅只係1%，輪價高收5.7仙，彈幅高達16%，捉正炒即日鮮，個零鐘頭已經有魚有肉。食得鹹魚抵得渴，炒仙輪可以賺快錢，亦可以輸到嗌救命。真係要賭，最好揀啲交投旺嘅埋手。
章盛