林峯雖然同無綫董事利孝和夫人好熟，演技亦唔錯，但今年無綫台慶頒獎禮上，林峯竟然食白果，就算連分豬肉嘅「我最喜愛的角色」都冇佢份，難免令人覺得好奇怪。
馮仁昭最近八到，有人話林峯份人太過沙塵同埋自負，無綫為咗唔想佢一朝得志語無倫次，所以要㩒住佢，唔畀佢鋒芒太露，所以台慶嗰晚要林峯乜獎都冇，挫一挫佢銳氣。
林峯出道以嚟，有唔少人讚佢演技好，令到佢自信心爆棚，永遠只係相信自己嗰套，唔肯接受人哋嘅意見，亦有唔少監製同導演試過教林峯做戲，但每次佢都會好敷衍咁話：「得啦得啦，我知點做喇！」結果搞到好多幕後對佢不滿，重同無綫高層投訴㖭！
加上林峯同利孝和夫人咁鬼熟，就算林峯唔將利孝和夫人個名成日掛喺口邊，其他人見佢咁鬼沙塵，都會覺得佢恃住呢個關係，先至敢喺度也文也武啦！
二人組合Shine噚日去咗中環大會堂，為兒童劇《超人阿四》宣傳。原來呢套劇係佢哋個戲劇導師詹瑞文有份搞，所以Shine特別嚟支持。Shine話：「我哋跟老師學做戲，改善咗啲懶音，不過因為我哋近排好忙，所以冇時間參與呢套戲嘅演出。套劇將會喺聖誕公演，我哋一定會抽時間去睇。」
羅敏莊噚日去電視城出席「十二月星辰」慶祝生日。日前有報道話羅敏莊因為陪邵逸夫（六叔）睇戲，所以先可以喺台慶當晚抽到層樓。羅敏莊噚日話自己重未被邀請，不過都知道六叔有個私人影院，佢話好想被邀請睇戲，最想睇番邵氏嘅經典電影。羅敏莊咁識講嘢，真係抵佢抽到層樓喇！
周星馳日前去咗新加坡宣傳，佢同當地記者講出年會開拍一套功夫片、《少林足球2》同埋《食神2》，問佢屬意邊個做女主角？星爺話新加坡靚女都唔少，好似孫燕姿咁，原來佢好鍾意聽孫燕姿嘅歌。
問星爺識唔識唱孫燕姿啲歌？佢竟然反問記者使唔使即刻唱畀佢聽喎。
陳見飛噚日去咗新城娛樂台，出席「聯Fan所OnAir拉票大行動」。有報道指佢爸爸陳澤民唔滿意商台對愛女歌曲播放率竟然係零，所以抽起咗約六位數字嘅廣告。陳見飛話：「唔知佢哋唔播我嘅歌嘅原因，但阿爸抽廣告，應該都有佢嘅原因嘅。」