𠵱家唔單止興私房菜，原來重新興私房Cafe，一間喺鬧市，一間喺離島，而且都是由20多歲的男女開，細細間，Sell溫馨、Sell感覺之餘，重Sell高竇貓！連屋企隻名牌高檔乖貓都出嚟陪玩陪坐，做埋生招牌！
記者：李玉蘭
攝影：陳穎 部份相片由被訪者提供
私竇係打躉之地，唔同私房菜食完就走，所以最好要有屋企Feel，舒舒服服，就像「你個竇」。「老闆娘」之一嘅阿Matt話：「我哋又唔去D，唔落Bar，唔唱K，唔四圍逛，所以好想有個又就腳，又乾淨闊落嘅竇口畀我同朋友聚吓！舒舒服服、斯斯文文玩夜啲。」於是三個好朋友共挖出12萬私己錢起「私竇」！而死黨Cradle更將屋企英國純種短毛貓擺上枱，要牠們一家六口「陪客」！
Cradle：「我哋開咗兩星期，最細嘅細佬已經有Fans日日捧場，因為佢鍾意係人都舔囉！爸爸MoMo就參加過貓展，夠淡定，評判重話佢肥仔兼大眼……」說着說着，一個日本遊客津久井先生摸上門都無人知，直至他指住貓仔大叫「Kawaii」，大家至知佢都係一名貓癡，「日本飲食條例管制森嚴，不可能『人貓同枱』，香港真係令人Exciting。」佢如是者玩吓一隻又一隻，一坐兩粒鐘，直至打烊！
除咗有貓玩之外，Cradle重會主動同人客傾偈搞氣氛，「我讀緊同做緊有關心理學嘅嘢，當然唔怕同人搭嗲！況且我養貓N年，又做過三年貓展評判繙譯，又同貓仔接生過，可以同人客分享養貓心得！我重識得玩魔術，教佢哋媾女，呢招都幾受㗎！」有咁多招數，所以Cradle係第二個生招牌。只要有五個人或以上，每人畀三百蚊就可以包場，包場六個鐘內，任食任飲之餘，Cradle重可以陪玩陪講任你舞！
Cradle重將黑膠碟、結他、寶麗來、玩具等三分之二嘅屋企嘢抬上竇，阿Matt鬼鬼馬馬說：「係咪有啲似青少年中心？因為我哋自小家貧，好辛苦至儲到筆錢開竇，咪乘機買啲自己細個好恨但又買唔起嘅Gameboy、好多炒豆聲但零舍好聽嘅唱盤……」嬌滴滴嘅阿Wing終於開口：「不過，呢度好多枱椅、電燈、書櫃、擺設都係我哋一手一腳做，重打算賣出去！」反轉每一樣嘢，背後真係有個價錢牌，「呢度除咗我哋幾個同幾隻貓，樣樣都賣得，賣晒我哋又可以轉另一個Feel，令到個竇永遠有生氣！」
你個竇
主持人：阿Matt（21歲）長者屋舍監
阿Wing（20歲）前診所護士
Margaret（29歲）空姐
Cradle（21歲）臨床心理治療師助理
賣點：貓仔陪玩、同貓仔拍寶麗來每張$20、黑膠任你打碟、結他樂器任玩、門口任畫貓樣做手工貼貓相、有油貓多食、小朋友鴛鴦（好立克加阿華田）、益力多冰冰飲
地址：香港銅鑼灣景隆街7號顯輝中心2/F
電話：28930533
時間：
星期一至四2:00pm-12:00mn
星期五至日12:00nn-3:00am
收費：每人最低消費$25
聽住海風，曬住陽光，呷住靚咖啡，感覺悠吓悠吓，有啲歸隱Feel，又有種日劇《沙灘小子》嘅度假感覺，所以呢度嘅男老闆會化名叫大貓，「因為平時做嘢已經要好追上潮流，所以一唔開工想畀自己唞唞！」女老闆叫細貓：「就係怕自己喺市區亂買嘢，所以每次放假都去郊外玩；就係咁，幾個月前行大澳，發覺搵唔到一間Cafe！路過見到呢間婆仔屋睇到海又睇到日落，七百呎地方租三千幾蚊，咪租嚟做竇囉！」
大貓話：「我哋用咗個零月，將原先陳舊婆仔屋改裝，加上自己鍾意嘅大梳化、藤椅之外，一唔使開工，就揸車入嚟。」雖然佢哋個人入咗嚟，但唔代表一定開舖，「啲客都問我點解唔寫營業時間出嚟，但我唔想咁大壓力，咪同佢講隨緣囉！」嬌俏可人嘅細貓話：「咪睇我哋嘅咖啡、意粉全部都係賣$18至$35，每一樣都係我哋親手揀新鮮材料去做，連咖啡都係用貴嘢，絕對唔馬虎！」大貓：「所以我哋嗰日Ready好，咪拉開度閘做生意！我哋聽Jazz，客人咪聽Jazz；佢哋想睇VCD，咪開嚟睇，總之大家悠悠吓就最自然！」
即使係咁，都有捧場客，細貓話：「最開心係有對情侶喺網上見到我哋嘅資料，專登由市區入嚟同我哋隻巨貓Ricky影相！」Ricky係一隻英國摺耳貓，最叻撩人玩之外，重好鍾意望住你對眼玩「互睥」！成日拖住14磅偉大身形四圍攤、曬太陽，看海看日落，悠吓悠吓。睇吓佢，真係會令人怒氣全消，呢個至係真正賣點！
HomemadeCafe
主持人：
大貓（29歲）廣告，家住九龍
細貓（24歲）模特兒，家住沙田
賣點：安坐Cafe可以曬太陽看海看日落，14磅巨型純種摺耳貓陪玩，一隻害羞家貓四圍匿。
地址：大嶼山大澳道1A地下（近巴士總站）
電話：26383850或74718326
網頁：
時間：星期六、日11:00am-7:00pm（但非經常性開舖）