廖創興九肚山皓朗山莊，又有新搞作。繼上次送地中海之旅後，今次改送更加實際嘅禮品。
即日起至下個月底，買A型大屋，可以獲贈一萬公升汽油。相等於8000支1.25公升汽水嘅容量；3500cc平治房車，可以打爆油缸125次。價值十一萬，相等於樓價嘅0.5%。雖然唔係話好多，但住皓朗，大部份都揸車出入，當係幫補吓都唔錯。
董事衛振聲話，皓朗賣咗22間屋，其中4間屬於大碼，套現3.5億元。重有9大1細，希望可以喺呢兩個月散貨。賣剩嗰啲，明年初改為收租。
廖創興呢排忙緊搬寫字樓，中環廖創興銀行大廈，就快清拆重建，廖銀總部會搬去附近新世界大廈，佢哋已經同新世界簽咗4年租約，明年起租。
新地噚日舉行股東會，傳媒自然唔放過機會，問吓幾位郭生對樓市點睇。
蘭西留意到，現場布置同舊年有啲唔同，房間中央放咗兩部plasma電視機，現場直播新地高層主持股東會嘅過程。
聽講新地咁做，係吸收舊年經驗，有啲坐後排嘅股東，不滿見唔到幾位郭生個樣。
對於「東家（股東）」嘅要求，新地梗係不敢怠慢啦！估唔到原來幾位郭生咁受股東歡迎。
濠江畀人嘅印象，係以賭業為主嘅地方，究竟嗰度做零售生意，有冇可為呢？有冇舖位可以租？蘭西最近見到個廣告，或者可以解答疑問。
位於澳門市中心噴水池區嘅中華商業大廈，𠵱家歡迎大家洽租。物業樓高五層，面積由七千到兩萬八方呎。
廣告重畀埋租務熱線、電郵同網址，等有興趣嘅租客，可以睇完網址，了解多啲先至租，都算周到，可惜內容未夠充實。
澳門商場舖位，來港招租，可見當地業主幾咁進取。佢哋宣傳賣點之一竟然係──全澳唯一內設電梯嘅商場。對於香港人嚟講，冇乜特別，但對當地人就意義大。
長實近期集中人手，賣上環帝后華庭，但對其他樓盤冇放鬆過。
好似下個開賣嘅新盤九龍塘畢架山一號，較早時重講緊買啲名畫番嚟擺，今日就已經有實質宣傳動作，聯同林寶堅尼（Lamborghini）一齊搞優惠。
林寶堅尼係貴價名車冇人唔識，聽講最平都要兩三百萬。
長實搵到佢合作，都係想用嚟配合買家嘅身份啫。咁樓盤買家，若果買林寶堅尼，應該可以平啲啩。
上海著名點心店，梅龍鎮集團旗下王家沙，喺紅磡蔡瀾美食坊，開咗香港第一間分店，集團要員親自嚟港主持開幕典禮，租地方畀佢嘅和記黃埔，重請埋影星葉童、食家蔡瀾出席，衣香鬢影。
梅龍鎮董事副總經理陸宏慶同蘭西講，香港人太鍾意食上海菜，所以嚟香港開分店，間舖八千方呎，有二百個座位，投資六百萬。
和黃拓展及市務董事徐建東就透露，𠵱家蔡瀾美食坊十四個舖位全部租哂，好似明年2月開幕嘅杭州美食張生記，就只能開喺黃埔花園第四期。
有人話畀蘭西聽，王家沙喺陽澄湖嘅飼養大閘蟹區有二百畝，做嘅蟹粉食品都係新鮮空運抵港。
梅龍鎮喺內地有房地產項目，淨係內銷都唔夠賣，所以冇打算攞嚟香港賣。估唔到佢哋除咗點心，連樓都咁搶手。
蘭西
電郵地址：