港股噚日牛牛皮皮冇睇頭，恒指升14點，收報10009。阿虎睇吓公仔箱有乜新聞，但話題都係離唔開港澳珠大橋。黑客同阿虎講，最近本港政界與商界為港澳珠大橋興建與否喋喋不休，搞到香港好似好心急咁款，而廣東省則有少少吊高嚟賣嘅姿態。不過，一直支持興建大橋嘅合和（054）股價就冇乜反應，收報5.25元，冇起跌。
其實政界及商界在某方面都要學識沉默是金，唔好經常俾人以為香港唔做某些項目就會好唔掂，在形象上削弱香港嘅議價能力。條橋唔起咪算囉，阿虎又唔信冇咗條橋香港會死，唔使香港納稅人嘅血汗錢俾人襟住搶。
廣興國際（1131）繼上月27日大跌近30%後，一直在9仙至10仙水平徘徊，但噚日股價又再大插，一度大跌36%至6.6仙，收7.3仙，仍跌29.8%。Cookie話，市傳有人欠耐性，要急於套現。公司早前以7.5仙作價，發行5.33億股新股畀李道光，收購養樂多9.8%股權，交易最遲本月底完成，即係話本月內隨時有大量貨源流出街。
裕元（551）噚日有一手2000萬股大手成交上板，每股21元，總值約4.2億元。市場即傳出有大基金沽貨，其後再傳出有裕元高層行使認購權後沽貨套現，跟住又傳出主要股東之一高盛散貨。無論如何，手貨已經名花有主，只要唔喺市場直接沽出，應該唔會對股價帶來太大壓力，裕元始終係一隻基金愛股，而且街貨唔多，唔易在市場大手吸納，只要唔係基本因素出現問題，仍會有基金肯接貨。此股噚日收23.05元，跌0.65%，未見有洗倉迹象。
阿虎