臨近年尾，似乎好多大陸錢流出嚟，經紀陳話精優藥業（858）稍後可能有搞作。
精優今年5月份，搞咗次先舊後新配股，批左1.2億股出街，之後股價雖然一度彈高，但好快就回落至0.20元樓下，攞咗貨冇沽者，真係好心傷。
不過，有班大陸炒家在低位收集，開始漸見成績．近期股價已經升回0.20元樓上，噚日收0.218元，但成交就仍然好細，只得百零萬元。
經紀陳話，聽聞大陸炒家稍後會有動作，配合新project做嘢，第一步就係搞活隻股嘅成交，然後再收多一陣貨，跟住就會開車，並叫小初得閒不妨留意吓，但唔好諗住係即食，因重未係時候。
另外，噚日被外資行品題嘅雅視光學（1120），大升11%，表現雖然好，但係沽壓都唔細，股價由最高2.225元，回落至2.075元收市。小初記得，呢隻股閒時冇乜成交，失驚無神出現咁多沽盤，真係奇怪。
慕容小初