每年有唔少知名學者訪問香港，各大學都會趁機邀請佢哋演講，不過巴閉學人精於研究、寫作，演講未必啱聽。記得好耐以前聽過華人經濟學家之中，極有名氣嘅蔣碩傑講佢嘅專長││貨幣經濟學，蔣教授講話陰聲細氣，英文如斷截禾蟲，我哋聽到瞓着晒，但震於佢嘅威名，冇人敢批評。唉，隔一兩個月睇佢在台灣《聯合報》嘅經濟評論，立論清晰、文筆整潔、內容嚴謹，簡直係另一個人。美國教授由於基礎教育唔同，多數能言善道，寫作與演講嘅差別就有咁大。
香港大學大牌教授王于漸係芝加哥大學博士，聽講佢嘅老師就係GuyBecker（貝加），呢位貝加教授係芝大嘅經濟學及社會學教授，史丹福大學胡佛研究所高級研究員。一九九二年諾貝爾獎得主，大名鼎鼎，佢以經濟學理論分析社會、家庭、婚姻、人力資本、犯罪與懲教，可說開創咗經濟學入侵社會學範疇嘅先河。貝加教授嘅成就，亦都加強咗經濟學微觀理論嘅威力，令不少社會科學學者跟隨。
或者係王于漸嘅關係，港大經濟金融學院邀請到貝加教授喺十二月二十號星期五，下午五時半至七時，到港大王賡武演講廳公開演講，講題係"IntellectualCapitalandOtherKnowledgeinModernEconomics"。平時喺《商業週刊》睇慣貝加教授專欄嘅，點可以唔去聽；不過要報名嘅噃，遲啲可能冇位。