早前，我哋曾經為大家報道過，不少關於新版奧迪S4嘅資料，並曾惹來不少車迷迴響；而響最近，廠方亦宣布咗關於新車嘅詳細資料，其中又以旅行車形式出現嘅S4Avant最受注目，皆因佢除咗實用性高之餘，狠勁馬力輸出亦係賣點之一。
新版S4Avant嘅車首造型與四門版相同，兩者同樣裝有附有電鍍框邊嘅鬼面罩及氣霸，響炯炯有神嘅頭燈組合襯托下，一份懾人魅力油然而生；另外，當然唔少得重有銀白色嘅門邊鏡殼、車頂行李架及四輪18吋跑車合金軨啦。車廂配搭方面，除一雙Recaro跑車桶椅承托力十足外，車內重有不少銀白面板裝飾，以及S系獨有嘅三幅式跑車軚環，務求能讓你有恍如置身高性能跑車之感。機械配搭方面，新車則以一台4163ccV8偈作動力核心，馬力輸出為344ps/7000rpm，而扭力則為41.8kgm/3500rpm，匹配一套6前速手動波箱及Quattro四驅系統，從而令性能表現更突出。有興趣嘅車迷，就要留意新車在港嘅推出日期喇！