朱總訪港，一句話支持起港珠澳大橋，大家先知哥頓胡應湘唔係流嘅。不過知情人士最近同八方講，哥頓反而變咗谷住度氣嘅「雞泡魚」。
哥頓話要起大橋，已經講咗十幾年，不過一直都係孤軍作戰，皆因大家都當佢得個噏字。政府信晒顧問報告話香港唔需要呢條橋，哥頓已經十分不滿，批評政府俾「顧問治港」。
起橋可能觸動和黃嘅貨櫃碼頭利益，得罪李嘉誠，誠哥頭馬霍建寧更公開警告哥頓「唔好做我世界」。其實當時冇人知，哥頓嘅後台非常把炮，表面上同霍大班激烈舌戰，背後已經悄悄將大橋份計劃書直達天庭，擺咗喺朱總枱面。果然今次朱總來港，除咗挺董，另一樣要挺嘅就係港珠澳大橋。北大人開到聲，阿董當然火速跟進，聲言年底前研究出結果，哥頓可謂吐氣揚眉。
點知呢個時候，哥頓一位老友就話今次佢可能開埋井畀人飲水，因為朱總話係好嘢，粵港澳政府搶住研究，雖然廣東省省長盧瑞華噚日話要先睇吓環保問題，扮吓嘢，但係肯定日後去馬時，個個財團會爭住上，哥頓嘅合和未必分到一杯羹，所以佢只好氣鼓鼓變咗條「雞泡魚」咁。
傳真︰2623-9278
電郵︰