一位女讀者Eva來電郵問十一月二十七日本欄講及曹仁超嘅「投資者日記」。Eva話喺《蘋果》網上版搵唔到，究竟係喺邊張報紙？勢估唔到讀者有此一問，Eva或者好年輕，唔識曹仁超，請你翻開《信報》，就會睇到全版嘅《投資者日記》；相信《蘋果》都好恨搵佢寫稿，只可惜老曹唔會制啫。
大編輯聽見曹仁超個大名就流口水，恨不得立刻開個專欄畀佢，但現實歸現實，佢亦知道冇乜可能。左丁山每有機會同佢飲茶，就同佢分享經驗：「世界上太多我鍾意嘅嘢，譬如汽車，想用時有齊寶馬、波子、法拉利，可惜荷包唔爭氣，無謂想創個心，最緊要係享受自己揸緊嘅錢七！」大編輯亦係知足之人，唔會好高騖遠，星期日中午佢揸架日本平價車去沙田馬會搵人飲茶，馬會範圍內封路，唔行得，佢好有耐性咁等咗十幾分鐘先至可以入到會所；等待之際，自不然有好多靚車經過，寶馬、波子、平治、凌志，唔少重配埋啲八八八車牌㖭，馬會停車場就有如靚車靚牌展覽會，見得多就視作平常，觀而賞之心情一樣愉快，豈在乎自己擁有。
點解沙田馬會要封路呢？原來英國愛德華王子伉儷駕到，馬會請佢在會所四樓旺灣樓食午飯，大編輯到馬會嗰陣，啱啱佢哋離開，其他人等自不然要讓路。呢位王子嚟香港，好低調，事先我哋完全唔知，星期六佢突然到場頒授「香港藝術節盃」畀顏傑強（「皇鷹」馬主），馬迷先至知道有皇室人員訪港，畢竟今時唔同往日，上流社會人物爭位巴結王子，已不多見！