日本駐港總領事館噚日為慶祝日皇生日，假港麗酒店搞咗個慶祝酒會，財爺阿松、工商及科技局局長唐英年、警隊一二哥曾蔭培同李明逵、大法官李國能、賭王何鴻燊，重有恒生大班鄭海泉都有到。
已經退休嘅鍾士元同黃宏發一齊入場，兩個一邊行一邊傾最近嘅人大選舉結果，發叔重話排倒數第十名當選嘅李鵬飛，呢次真係「驚到鼻哥窿冇肉」。
跟住八方就見到飛哥到場，佢撞見自由黨黨友唐英年，即刻拉住佢企喺人來人往嘅樓梯，傾咗十幾分鐘，八方只見飛哥不停講人大選舉講到手舞足蹈，重大大聲講咗句「離晒大譜」，唐少只有聽，冇得講。睇嚟飛哥對選人大險遭封殺，重係耿耿於懷。
（圖）飛哥同邊個企喺樓梯傾得咁入神？得個背影係難估啲，答案就係唐英年局長。
傳真︰2623-9278
電郵︰