九人女子組合Cookies其中兩名成員Gloria同Helena都喺今個月生日，Gloria噚日牛一、而Helena就喺前日生日，所以前晚佢哋兩個就約埋Cookies其他成員一齊去咗尖沙嘴嘅加州紅卡拉OK慶祝一番。
Cookies嘅一班圈中好友如EO2、關心妍、谷祖琳同蕭正楠都有到賀，Helena同Gloria嘅生日願望就係Cookies可以有更加好嘅發展。
喺前晚嘅生日會，佢哋嘅唱片公司EMI並冇出錢同佢哋兩個壽星女慶祝，所以前晚搞嘅生日會都係AA制，全部嚟嘅人都要夾錢，唱片公司就話咁做都係想一視同仁，因為Cookies嘅成員太多，如果要逐個同佢哋搞生日會就有排搞咁話。而噚日Cookies佢哋就去咗尖沙嘴，為無綫一年一度嘅籌款節目《歡樂滿東華》，進行宣傳活動。
李彩樺（阿Rain）噚日喺石澳出現，宣傳網上連線劇《百分百感覺——冬日戀曲》，噚日陽光普照，最高氣溫有成二十五度，點知阿Rain又攬頸巾又着長靴，阿Rain話：「我今日真係着錯衫，熱到我死。」阿Rain又表示已經同正東滿咗約，問佢續唔續約？阿Rain就話：「我都唔知，我交晒畀黃柏高處理。」
明年年初喺泰國舉行嘅「2003曼谷國際電影節」，喺前日公布咗入選名單。由張藝謀執導、張曼玉、梁朝偉同章子怡主演嘅《英雄》，除咗俾大會挑選咗做閉幕電影之外，重有份角逐最高榮譽「金人鳥獎」，入圍角逐呢個獎嘅重有由里安納度迪卡比奧（LeonardoDiCaprio）主演嘅《GangsOfNewYork》㖭！
早排英皇高層吳雨批評IFPI唔應該到年尾先改制，噚日IFPI發咗聲明解釋銷量大獎嘅參選資格，係由委員一齊開會作出決定，而一切政策改動係由委員投票決定，話根本冇違反喺三年內唔可以改制嘅規矩，重話會對不實報道保留一切追究權利。不過吳雨就回應話事實勝於雄辯，最好就攞啲真憑實據出嚟，不過講到底佢都會尊重IFPI嘅。
韓國歌手河利秀，喺九六年做咗變性手術後，佢雖然以女人姿態見人，但原來佢嘅戶籍都未改，喺韓國嘅法律上重未算係完全嘅女人。聽聞河利秀啱啱去咗申請更改戶籍，假如成功嘅話，佢就可以成為真女人，以後可以喺韓國享有一般女性嘅權益，好似可以同男人合法結婚咁囉！