大市噚日急跌二百幾點，但小初提過嘅富士高實業（927）就不跌反升，雖然只升1.7%，但股價已經去到1.17元，睇嚟好快就到1.32元嘅52周高位。
講起工業股，小初想提吓葉氏化工（408），隻股上個月公布中期業績，盈利較去年同期幾乎升1倍，達到6241萬元，中期息4仙，當然係股價上升嘅理由。不過，噚日小初睇完葉氏化工向建滔（148）回購股份嘅股東通函後，先至明白點解葉氏化工近排股價咁靚嘅真正原因。
葉氏化工早在9月份，已公布用4千幾萬元，以每股0.88元，向建滔回購唔夠9.6%股份。當日葉氏化工股價大約係0.90元，回購價0.88元咁高，其實對公司冇乜着數，亦好難令人信服，而呢份通函，就一再延遲寄發。
近期葉氏化工股價急升，維持在1.30元樓上，反映用0.88元回購，簡直係抵到極，而呢份通函亦及時面世。
慕容小初