聖誕就到，有冇諗過擺棵另類聖誕樹喺屋企應節？香港救助兒童會今晚喺君悅酒店有個名為「兒童愛心聖誕樹2002」活動，拍賣十棵由名牌公司贊助嘅聖誕樹，為該會籌款，預計會籌到過百萬。
八方噚日去太古廣場睇咗個預展，其中由路易威登（LV）贊助嘅聖誕樹，貫徹咗公司產品「啡」色格調，一個啡色大三角透明膠就係已經可以當聖誕樹，至啱鍾意簡潔嘅人。八方覺得最抵嘅，莫過於由ChristianDior贊助嘅聖誕樹，棵樹係由十個放有該公司手袋同銀包嘅透明盒組成，過咗聖誕節後，將棵樹拆骨，大把名牌袋用，真係睇得又用得。
律政司司長梁愛詩噚日去預展做主禮嘉賓，唔知係唔係八方多疑，見到佢睇過啲新型聖誕樹後，不時搖頭，好似唔多鍾意咁。
（圖）呢棵CD聖誕樹裝滿手袋銀包，真係令女士們動心。 張家俊攝
傳真︰2623-9278
電郵︰