𠵱家啲外國歌手組合出唱片唔會淨係sell歌咁簡單，點都要搞吓花臣，好似RobbieWilliams、KylieMinogue同Blue嘅唱片宣傳品愈出愈新奇，幾乎妹仔大過主人婆！
好似以全英最高身價同EMI續約嘅Robbie，佢喺新大碟封套入面除咗扮成特技人之外，佢嗰隻專為派畀傳媒而設嘅訪問CD，就整到成個圓形鐵盒咁，盒入面重有珠仔迷宮遊戲畀你玩！而女歌手KylieMinogue都唔弱，佢嗰張加送remix CD嘅大碟，重送埋條K字頸鏈，都幾落重本！
至於近排同艾頓莊（EltonJohn）合作嘅四人組合Blue，為咗配合新碟《OneLove》嘅主題，真係送咗個「藍心」畀fans！呢個「心」其實係一個小型錄音機，可以畀fans玩錄音同播放短暫訊息，一定冧死啲歌迷！
人氣DJFatboySlim一向以實力取勝，不過今次佢都要玩吓嘢，佢隻萬人海灘齊齊rave現場錄音大碟，亦附送迷你沙灘椅應景，十分頂癮。