地產多聲道:安寧花園細細粒容易炒

地產多聲道:安寧花園細細粒容易炒

地鐵將軍澳支線通車後,帶動區內交投,喺通車前入貨嘅炒家紛紛獲利,鴻運地產倪德強透露,呢批炒家個零月淨賺十到十四萬,都幾和味。由於11月已經成咗五六單,所以𠵱家剩低唔夠十個炒盤。
倪德強話區內熱門短炒盤係安寧花園同煜明苑,因為多細單位,唔使一百萬,一次過付款買入,再用兩三萬執吓就賣得。正所謂「細細粒容易食」。
啱啱鴻運就做咗單炒家貨,係安寧花園二座低層D室,面積638呎,個炒家喺10月用九十萬入貨,𠵱家以市價105萬沽出,淨賺超過十萬。安寧花園自由市場呎價千六蚊,第二市場就1250蚊。
估唔到當日因沉降問題搞到好大件事嘅安寧花園,今日竟然咁搶手,真係風水輪流轉。

九龍站發展商夾錢起路
由於九龍站上蓋有多個住宅項目,由不同地產商發展,為咗可以有最直接通路貫連咁多期發展,同方便跟外面道路網連接,幾家發展商永泰亞洲、九龍倉、新鴻基地產同恒隆地產走埋一齊,諗咗兩條道路(圖表中紅色路線)設計,並已得到運輸署批准,估計總花費要千八萬,2004年搞掂。
其中一條線接西隧口,起一條天橋橫過雅翔道,由擎天半島兜落成個發展區。
另一條出入口設喺漾日居同第三期之間,接連翔道。因為呢條線近第三期同第七期,發展商新地得益最多,所以新地要畀六至七成建築費,九倉距離最遠,着數最少,只佔約一成左右。

非牟利團體攞地平啲
政府一向都支持為大眾提供多元化社會服務嘅非牟利團體,所以撥地畀佢哋時,通常都唔收地價或者象徵式收少少。𠵱家由地政總署處理緊呢類個案有成十六宗,涉及二十一公頃土地,包括亞洲協會申請金鐘正義道前軍火庫做會所,同香港女童軍總會申請喺佐敦道與渡船街交界起新總部及旅舍。
政府話呢類申請,一定會列明指定用途,一般由十年到五十年。

興業再搞空中睇樓
香港興業嘅東涌藍天海岸,今日再搞直升機空中睇樓活動,由於之前安排失當,累記者白跑一趟,今次倍加細心,講明朝早十點前會通知大家成唔成行,但無論點,記者會就一定照開。
香港興業陳子明近日唔單止出席代理搞嘅誓師大會,連美聯嘅月會都去埋,目的都係為藍天海岸,認真落力。
蘭西
電郵地址:[email protected]